關楚耀同衞詩喺日本藏毒嘅事件已過咗年幾，佢哋一早各自展開新生活，關楚耀喺樂壇再出發，反應唔錯，嚟緊仲有新發展。前日記者見到佢同唱片公司嘅人去咗尖沙嘴富豪酒店，原來約咗《妙手仁心》嘅金牌監製鄧特希，佢哋有講有笑，關楚耀又好專心聽鄧特希講嘢，不時點頭附和。
馮仁昭收到風鄧特希會幫亞視開拍一部類似美劇《Friends》嘅處境喜劇，想搵關楚耀做男主角，其餘演員考慮緊o靚模盧頌之（DaDa），預計出年1月開工，2月播映。馮仁昭噚日同關楚耀傾過，佢大方直認會幫亞視拍劇，佢話：「其實我之前出完碟都想有啲新嘗試，我又未試過拍劇，我覺得呢個安排好好。」佢話鄧特希畀咗好多信心佢，皆因鄧特希覺得佢再返出嚟後，成個人唔同晒，而且一個有經歷嘅人演戲應該可以深刻啲喎！

衞詩：好想唱番歌

而衞詩噚日同劉以達及陳敏之喺挪亞方舟拍福音電影《翻生奇兵》，衞詩飾演伊甸娃娃，攞住隻小蜥蜴把玩。套戲講重生，係咪黎明都畀佢重生放生佢？衞詩話：「可以咁講，好開心。我會做好自己，畀信心公司。」
雖然事發後都未見過黎明，但佢同陳善之關係好好，仲話：「佢哋要忙家姐（衞蘭）演唱會，我唔會打攪佢哋。」衞詩仲話好想唱番歌，未知會唔會做衞蘭個唱嘉賓，但會同父母去捧場。關楚耀知道衞詩有新工作，都戥佢開心話：「幾好呀，希望佢都有個好開始。」