港股今年一月升3,000點，二月跌2,000點，本月高低波幅已超過一千點。上一篇blog講「港美一厘息差的啟示」，不代表睇淡後市，或者估計由牛轉熊，只是借昔日數據講出未來本港股樓可能面對的風險，提醒大家在市況續CHOK環境，減槓桿及增防守性股份而已。

有泡沫不代表會立即爆，只是股市風高浪急的場面，年內肯定繼續頻密發生，周內港股梅花間竹日跌700點，日升600點，跟車太貼以至炒出炒入的投資者，很容易被左一巴右一巴、進退失據。

港滙跌穿7.84水平，走資末日論又再此起彼落，究竟港滙一旦觸及7.85弱方兌換保證水平，會發生甚麼事，答案係暫時唔會有事。陳德霖撰文，只是鋪路金管局放水，為加息提供先決條件而已，至於背後的潛台詞以及所謂走資論，日後會再撰文詳述，今期集中講強積金（MPF）策略。

去年港股差不多由頭升到尾，多隻港股MPF亦錄逾四成回報，升市人人係股神，錄佳績不意外，但市況逆轉、能夠打逆境波，方稱得上是真高手。二月港股急回超過6.2%，49隻港股MPF中（見表），沒有一隻能逆市升，跌幅超過6%的有20隻，跌幅少於5%的只有5隻，其中以永明彩虹強積金（香港股票基金A）跌3.73%最佳。

五隻上月最佳港股MPF，都有一個共通點，就是過去一年及五年，都是港股MPF的長勝將軍或前列份子。至於去年表現最好的海通香港特區基金A，二月後勁不斷，月蝕5.9%，可再觀察多一兩個月再作判斷。

港股MPF有一間受托人可以放棄，就是友邦。二月包艇是友邦強積金優選計劃-中港基金，單月蝕近7%，同屬友邦的香港股票基金亦輸6%，過去一年及五年亦是包尾，升市冇表現，跌市媲美大市，堅持唔走，結果是冇好報。

順帶一提，就算是同一受托人旗下，不同名稱的港股MPF，回報差異亦十分大，最好例子是永明MPF。旗下皇牌只有彩虹強積金計劃，同系永明強積金基本/綜合計劃，以及永明強積金集成信託計劃，上月回報遠遠跑輸彩虹計劃，更是港股MPF中最差之二，即使是一年或五年，表現亦遠遠落後。故此，揀啱受托人，更要揀啱計劃，不同計劃由不同基金經理操盤，表現熟優熟劣，時間可以驗證。

股榮

https://www.facebook.com/stockwing1/