上星期五，政府公佈恒隆地產（101）失落金鐘廊承租權，當時身在濟南嘅恒隆董事長陳啟宗（洋名朗尼）一啲都唔感覺失落，反而非常風騷。皆因當日係旗下濟南恒隆廣場開幕之喜，開幕禮完咗，朗尼陳帶一眾傳媒行商場，沿途前呼後擁，啲濟南市民同佢又傾偈又握手，十足明星出巡，難怪佢咁風騷。據聞朗尼陳今次仲帶埋老婆同個仔出席。
朗尼陳今次都算風塵僕僕，話說開幕儀式早一日，佢仲喺北京演講，之後就坐動車趕落濟南。周四晚華華同幾個老友喺酒店HappyHour傾偈時，碰到朗尼陳，時為夜晚11點，原來佢啱啱同班省級、市級官員摸杯底。見到華華寒暄幾句，佢話由恒隆決定投資濟南開始，山東省班官就好幫忙，07年嚟濟南開董事會時，省長、省委書記、市長、市委書記都出席。

今次正式開幕，省級同市級高官都畀面參加，咁嘅排場，除非國慶，或者領導人嚟巡視先至見到。
咁點報答人先？一向自信心爆棚嘅朗尼陳話：「我喺度起咁大個商場，投資咗咁多，已經報答咗啦！」咁仲會唔會繼續喺山東投資？朗尼陳就話，山東省的確係好地方，真係要好好考慮再下一「城」。問佢喺邊個城市？會唔會喺青島，佢就笑笑口話，青島的確係好地方。唔知青島幾時會有座恒隆廣場呢又？

李華華
mailto:[email protected]