蘋果一口氣推出3部新iPhone，究竟邊部炒得起？流動通訊帝國負責人阿基表示，iPhone X有Face ID功能較吸引，「iPhone X一定炒得起！預計（每部炒價）會較定價高1萬至1.5萬。第一水之後價錢會回落得好快，建議買到就盡快放。」

但他坦言，iPhone 8較為輸蝕，「唯一好處就係佢唔係同iPhone X同期出，相差都around一個月。所以我覺得iPhone 8 初初出都有幾百蚊水位嘅，頂盡一千蚊。」

他解釋，主要由於國內定價較高及人民幣匯率高，iPhone 8系列方有炒賣空間，「但可能一水就（炒）完。」加上今年新增不可退貨的限制，增加炒賣風險，「有可能損手。」提醒炒家入貨前宜小心行事。他又透露，已經預留200萬至300萬元入貨，更指有店舖會留逾千萬元入貨。

壹訊負責人阿羽表示，iPhone 8與iPhone 7性能相近，但iPhone X明顯有驚喜，「無home button 又可以面部解鎖，所有依家嘅iPhone都做唔到。」他預計，iPhone 8大概會有「千零蚊水位」，但iPhone X炒價「可以去到兩萬一、兩萬二，一萬蚊水位到。」

舊iPhone回收價亦受影響。阿基指：「平均都跌咗兩到三成，嚟緊iPhone 8一出個價會再跌，因為愈來愈多人trade。」

此外，就現場所見，大部分店舖都只接受iPhone 8查詢及預訂，不見iPhone X踪影。有不願上鏡的負責人表示，因iPhone X較遲推出，「又唔知幾時有貨，廢事擺出嚟啦。」

記者：溫婉婷

蘋果財經，關心你飯碗
http://fb.com/appledailyatm