余文樂前幾日36歲生日，台灣「皮帶大王」千金女友王棠云（Sarah）當然嚟香港陪男友過生日，仲親手整蛋糕同佢慶祝，噚日佢仲喺中環行街，跟手去咗中建大廈樓上嘅醫療診所。（新聞連結： http://bit.ly/2zMwup1 ），不過就未見樂仔踪影。

今日約2點，樂仔就一個人揸住佢部林寶堅尼辣跑，喺佢淺水灣寓所出車，見到樂仔嘅警覺性非常高，好快就發現有傳媒追訪佢，佢就一支箭揸咗架車去觀塘某商廈，泊好車已有女助手喺停車場匯合佢。

記者見到樂仔，就即係上前問佢係咪準備同Sarah結婚，佢就一概否認：「冇冇冇，係就會通知傳媒。」追問到佢Sarah係咪有B，佢再否認，仲解釋女友日前睇醫生嘅事：「佢係陪一個女性朋友睇(醫生)，唔係佢睇。」心情好好嘅樂仔仲笑言記者嚇怕咗佢女友。

更多娛聞，喺晒《娛果》
http://fb.com/appledailyent