【政治表態】勇士捧盃獲邀訪白宮? 大衛韋斯:不了
NBA籃球勇士白宮騎士季後賽大衛韋斯特朗普拉格比新英倫愛國者匹茲堡企鵝
勇士未知有冇得去白宮,但大衛韋斯就率先向特朗普say no。
勇士贏咗NBA總冠軍唔夠一日,咁快有人搞寸party?仲要係美國總統特朗普?根據慣例,北美四大運動聯盟冠軍都會獲總統邀請到訪白宮接見,周一喺總決賽以4:1擊敗騎士封王嘅勇士,將會成為特朗普上任後首支獲邀接見嘅NBA盟主。不過,喺勇士周一稱霸後冇耐,有美國《CNBC》記者就聲稱,勇士全隊一致達成共識將會缺席白宮之行,班主拉格比(Joe Lacob)周二接受《ESPN》訪問時就不諱言:「我難以相信已經要迎接呢個問題,但坦白講,呢個係我哋目前憂慮嘅問題。」球隊就表示暫時未收到邀請,一旦成事,屆時先會作出決定。
其實特朗普喺去年贏出11月總統大選時,勇士教練卡爾(Steve Kerr)就曾經批評佢喺競選活動期間經常使用「種族歧視、侮辱女性同攻擊性」言詞,伊古達拉(Andre Iguodala)早喺Game 5賽前已經表示:「Hell Nah!(唔好啩!)可能佢冇邀請我哋,而我哋冇去到,或者我哋可以分道揚鑣。我可能打畀佢話:『如果有人問起,即管話我哋夾唔到日子。』如果你哋咁報道,我哋就會話:『假新聞。』」而老將前鋒大衛韋斯(David West)周一就率先表態:「我唔知道,應該唔會出席,但我目前只會享受勝利。」
不過,日前贏得NHL史丹利盃嘅匹茲堡企鵝,其班主David Morehouse就表明唔會拒絕白宮邀請,將會全隊出席。特朗普上任後,先後邀請NFL超級碗冠軍新英倫愛國者同大學足球冠軍Clemson到訪。