新年行街，碰到秘書Ｖ，佢話睇咗年廿九（一月二十八日）本欄講「名醫宣傳？」，有啲事不吐不快。秘書Ｖ嘅表姐律師M住在美孚新邨，收到一啲醫學化驗所宣傳單張講「健康檢查優惠」，話明益街坊，優惠美孚居民。律師M一睇，全套健康檢查費用只收三百六十大元，檢查項目有二十五項之多，包括照肺、血全圖（如平均血球色素，血小板數量等）、肝功能、乙型肝炎表面抗原、腎功能、血糖（糖尿病）、膽固醇、三酸甘油脂、血尿酸（痛風）、小便檢查等等。
抵到爛噃，律師M於是立即打電話ＸＸ醫學化驗所登記，第二日就去佐敦道地鐵站，去化驗所檢查上述二十五項。

收到健康檢查報告之後，即刻驚到面青，因為報告嘅數據顯示，律師M嘅肝功能唔掂，肝酵素太高，比正常數量高出三十倍！報告又介紹一位醫生名字俾律師M去診斷。律師M收咗份報告，幾日唔敢對家人講，日日照鏡睇自己塊面是否太黃，卒之抵唔住，問秘書Ｖ：「我最近隻眼好似轉咗黃色，你幫我睇真啲？」秘書Ｖ問多兩問，先知道有驗身報告呢回事，立即叫佢去睇家庭醫生。家庭醫生睇咗啲數據，哈哈大笑：「如果肝酵素真係咁高，我同你服務十幾年就真係走晒眼。全套檢查共二十五樣，只收三百六十蚊？我收你千二蚊都要蝕本啦。我就話你冇事，你最好再驗多一次。」律師M已經俾醫學化驗所報告嚇到心緒不寧，聽家庭醫生咁講，定番一啲，於是用多千幾蚊，再驗身一次。報告出咗後，家庭醫生同律師M講：「你好正常，乜事都冇。好彩你嚟搵番我，否則會花費金錢與精神。唉，既然你冇事，而嗰份醫學化驗所話你有事，容乜易有人真係有事，而份報告會話佢冇事，咁就害人！」
律師M買咗個教訓，好想知多啲資訊，但係法例容許化驗所兜客，就唔俾醫生宣傳，周一嶽與醫務委員會唔該做吓嘢！