「超人之母」羅子喬噚晚喺亞博出席「鹹蛋超人」舞台劇首演，羅子喬表示噚晚喺第一場演出，心情難免緊張，佢話：「呢幾日打風，天氣悶熱，有部份演員因為咁病咗。」問到演幾多場？佢話喺香港會演十場，稍後去亞洲唔同地方做八十幾場。

咁係咪豬籠入水？佢話：「收入好咗，同埋多咗其他工作機會，演出唔使講日文，部份演員識得英文，巡演以講廣東話及普通話對白溝通，因應唔同地方會有配音。」

問到演「超人之母」有乜感覺？佢話好開心：「第一次同日本人合作，嚟緊八十幾場都一齊，裏面唔會有性感演出。下一部會做電視劇及電影，傾好落實會做。」

而陳嘉桓（Rose）同周嘉莉噚晚都有捧場，Rose表示對超人感覺一般，因為自己鍾意較女性化嘅嘢，但覺得呢個場合啱一家大細參與，佢又話自己有睇過卡通片，細個覺得細佬係怪獸，借啲易會搣佢同打佢，佢話：「細佬仲問我會唔會揀超人做男友？我話一定唔會囉，因為覺得心目中超人係會閃閃吓，跟住冇電，然後飛走咗，所以超人係只可欣賞，不可做男友。」

另外，周嘉莉表示有與亞視舊同事聯絡，佢話：「知道有新老闆，同埋招兵買馬中，（返去？）暫時冇合作，如果要幫手客串都OK，有時Rose都義務幫手。」記者轉問Rose係咪冇錢收？佢就耍手話：「我唔知呀，總之有嘢做我咪去做。」