當年今日
關於我們

Morning娘制服誘惑留客

蘋果日報 2004/01/10 08:00


我羅拉近排睇日本雜誌新一年預測,都話Morning娘晨女今年會摺得最快,其實呢點佢哋都一早知道,所以舊年拿拿臨拆咗做「櫻花組」同「乙女組」兩隊,然後演唱會都分兩場,實行搵兩份錢。
乙女組喺上個回合同櫻花組同時出碟鬥銷量,結果輸咗個馬鼻,集合咗比較多靚女嘅乙女組,今次演唱會鬥入座率實在係許勝不許敗,所以隊長飯田圭織、石川梨華加藤本美貴,率領年紀重細嘅田中麗奈等人,以多套制服look露臍七彩歌衫,加溫馨校園小品短劇搶客,我羅拉聽到嘅feedback都OK。

緊張到肚痛
晨女話到明為咗可以同觀眾近距離接觸,而專登拆開兩隊去細場做,乙女組一開騷梗係好識講嘢,其中小川麻琴就話:「同fans咁近,我真係有啲怕醜呀!」田中麗奈就重誇張咁話:「真係令我緊張一倍!我個肚好痛呀!不過聽到fans咁大聲叫我麗奈,即刻精神晒!」咁識講嘢,呢個回合睇怕都係乙女組贏喇啩!