今天父母,培養仔女由細到大,無微不至,出錢出力出時間,不問回報。賓架K話佢哋銀行聘用大學生,新人入行,做前線人員嘅,好快就要孭quota,其實間間銀行都有類似要求。新仔點樣可以埋到大客身旁呀,孭quota其實孭得幾辛苦。賓架K話:「總之各師各法,人人各顯神通,你唔使知咁多嘅。」
生性八卦,點都要問清楚。打咗幾個電話,接通咗電子E。電子E位乖仔去咗英國八年,讀完大學返嚟,喺銀行做貸款主任。問電子E:「你位乖仔點樣應付銀行quota?」不問尤自可,一問就觸電。電子E大大聲講:「做人老竇,有乜辦法,供書教學二十年,𠵱家搵到份銀行工嘞,要周圍搵客,唔通睇住佢俾銀行趕走咩,佢嘅quota變成我嘅quota,我掹咗幾位老友工廠去捧佢場,存錢入銀行,幾個月替佢搵到一億存款。銀行話佢表現超標、超卓,好誇獎佢。真係得啖笑。」唉,電子E當年邊度有老竇照呀,佢老竇住木屋,搬上公屋,電子E從無到有,供養父母全靠自己,估唔到現在會「代子從軍」,背後發功!