賀歲片《如珠如寶》拍得如火如荼，大家表面上嘻嘻哈哈，不過最近有段王菀之被欺凌片段流出，佢自爆喺片場俾人蝦。

片中阿Bob林盛斌同張繼聰喺陰涼處攤唞，不過Ivana就冇咁舒服，要坐喺出面捱熱，唔怪得佢酸溜溜呻爆：「我今日應該會曬黑，冇辦法啦！我呢啲演員唔配有呢啲櫈坐，兩位大爺（張繼聰同林盛斌）嗰度就會涼啲⋯⋯」

張繼聰聽到即時反擊：「好多女演員同真實唔同嘅，頭先我哋就問阿之點解唔坐入去涼冷氣，佢話想曬太陽，點知調轉頭佢就欺凌我哋……你睇阿Bob……」阿Bob勁火，一手拍落張枱度，又係嘅，咁老屈法，佛都有火啦！

之後阿聰仲寸多Ivana兩句：「你哋唔好再俾佢純潔嘅外表呃到！殺人放火佢有乜嘢冇做過吖！第一日明明有幾個燈光師傅㗎！阿之話唔鍾意佢哋，之後冇見過佢哋喇！」

句句寸到行，原來成班喺度玩爆肚，不過講道行，都係阿聰高啲！Ivana梗唔夠佢玩。

精選娛聞，喺晒《娛果》
http://fb.com/appledailyent