內地遊客喺香港被劏，港府多個部門高調做嘢，八方遊埠時都遇過奸商，請教旅發局主席田少精明購物之道，佢話買名牌唔好貪平，最穩陣係幫襯專門店，包冇事。「都唔明點解啲大陸客買名牌都要搵人帶路。」

田少話，專劏遊客嘅黑店，好似淨係得大中華區先有，英、美、日本呢啲地方好少聽聞有劏遊客事件。呢方面八方有同感，香港人返大陸玩都俾人呃得多。田少仲自爆差啲做水魚經驗，有次返大陸，有個老千𠱁佢買件幾十萬嘅雕刻品，佢數口精，梗係冇中招；有次去土耳其伊斯坦堡買羊毛地毯，老闆開天索價要十幾萬，仲話唔買走寶，田少見慣大埸面，落地還錢講價，結果幾萬蚊成交，不過佢話出去玩預咗俾錢人賺，當促進當地經濟。
港府硬接中央電視台個波，田少相反，將個波大腳踢番上大陸，同八方講呢單嘢實情係屈錯咗香港人。田少話據佢了解，呢啲劏客豬仔團，由開旅行社、錶舖、帶街以至售貨員，好多都係新移民做嘅，「香港人」冇份，𠵱家出事入晒香港數，令香港旅遊業蒙上污點。佢又指呢啲購物團，團費咁低，啲客報團時應該預咗俾人帶去買吓嘢，帶街收吓回佣在所難免咁話。

香港人幫熊貓改名好踴躍，港澳辦副主任陳佐洱個女、海洋公園保育基金主席陳晴噚日同八方講，收到嘅8,000幾個提名大部份都係叠字，好似佢咁叫晴晴好唔好？佢話唔好講咁多，費事影響評判決定。
一對熊貓已經準備起程，正喺四川被隔離，當地檢疫局仲全程監察佢哋嘅一舉一動，記錄晒身體、行為同埋心理狀況，重點量度體重，又會檢驗牙齒、體溫，以及心肝脾肺腎同生殖器官嘅發育情況。根據一般做法，熊貓送去外地前15日起要被隔離，照咁計，熊貓孖寶好快就會嚟香港咯噃，八方噚日打電話去北京國家林業局熊貓辦，接聽人員話仲未定起程日期，遲啲自有宣布。又有報道話，大熊貓將會坐中國南方航空直接嚟香港。