改編自韓國同名人氣漫畫、由男團ASTRO成員銀優及女星林秀香主演嘅JTBC新劇《我的ID是江南美人》（江南美人）近期喺韓國熱播，劇集噚日播出第11集，收視微跌至4.2%，港劇迷可於Viu同步追劇。

劇情講到林秀香為咗變靚而整容，仲同以前同學仔車銀優重遇，承接上集心機女趙宇麗約林秀香見面，話自己鍾意銀優，叫林秀香幫自己，趙宇麗言語間指整容變美嘅人無而令到原本漂亮嘅人受到損失，此時林秀香終於知道趙宇麗原來一直討厭自己。

林秀香同銀優一齊打工，男同事喺背後談論林秀香，話佢個樣似整容，但身材好應該個胸冇整，銀優聽到大感不滿，即時嬲爆打對方，林秀香上前勸交，點知被男同事話：「我對你呢種爛貨冇興趣。」最後銀優同男同事又打起來，之後仲上咗差館，警察話兩人和解就唔追究，男同事要求銀優道歉，點知銀優卻話：「對不起...我應該打死他！」

林秀香多謝銀優為自己出頭，但唔想佢為咗自己打交，銀優就要求以後要管林秀香嘅閒事，林秀香就話咁樣會令佢有錯覺，銀優拉住林秀香嘅手反問：「你有冇有啲鍾意我？」

下集預告趙宇麗主動抱住銀優，點知被林秀香見到，銀優同林秀香喺雨中對望，似乎有望喺今集肯定雙方感情。

而有網民就捕獲林秀香同銀優開工，兩人戴上黑色口罩於街上手拖手，似乎已發展戀人關係，低調約會。網民笑言如果唔係見到有劇組人員，仲以為二人戲假情真呢！

精選韓流，喺晒《娛果》
http://fb.com/appledailyent