外表乖乖嘅葉芷如，喺慈善電影《我們的6E班》與孫耀威合作，扮演老師。芷如自細被父母安排學小提琴，但因為太辛苦，亦試過反叛，搞過一場小革命，佢話：「由小一開始，每日練3個鐘，唔知為乜，我唔係真心鍾意，長期心理抑壓，後來我呃媽咪話要考公開試，冇時間練琴，如果考上大學先再學，後來我話自己去做運動，但其實係去學跆拳道學功夫，冇再學琴，後來媽咪都知道咗。」旁邊嘅孫耀威猛咁點頭，認同要做一啲自己鍾意做嘅事。

成績不俗嘅孫耀威，但其實係一個問題學生，小學開始已經成日打交，同老師頂嘴，故從來都唔會讓佢負責班長或者風紀隊長等要職，佢話：「成績好，唔代表係乖寶寶，我喺大學讀電腦工程系，個個好宅，做通宵唔擦牙到第二朝又繼續，不過我有另一面，我好鍾意玩、留長髮、夾band，好細個已經去蘭桂坊，我發現有個教授同我一樣，我哋唔理世俗眼光，兩個飲啤酒傾偈，完全入晒我世界去聽我嘅故事，當我有錯，佢會突然間好惡去教我，我會去思考，到今時今日，每個星期都會聯絡，係亦師亦友。」

回憶當年孫耀威入行嘅時候，呢位教授知道之後都好開心：「佢完全冇反對，跟住仲同我研究歌，畀到好多支持我，我最記得出嚟唱咗幾年，再返中文大學做表演，我就捉埋佢上台一齊夾band，感覺好得意。」

採訪：黃曉妍
場地：美麗華酒店

孫耀威
服裝：tuxee.co
髮型：Sunny Yu of Hair Culture
化妝：江中平化妝室