嘩嘩嘩，原來喺香港呢個號稱好安全嘅地方，都會有人突然人間蒸發，雖然銅鑼灣書店股東李波最終以傳真「報平安」，但到底係咪自願？大家心照！明明係疑似無厘頭被挾走嘅受害人，竟然會被立法會議員話係北上尋歡之惡果；金融界吳亮星呢番喺議事堂講出嘅無稽之談，惹起社會反彈係預咗，但有人曲到圓咁話，有冇諗過呢點星星之火，另有目的所以犧牲小我？
查實吳亮星收到所謂有關「李乜先生」嘅短訊，唔少建制中人都收到，邊個有組織咁發出？唔少人心中有數。但到底有幾多人相信？政界中人又點會咁單純？有人同花生友講，收到後一笑置之，知道有乜嘢機器啟動咗就算數，但萬料不到吳亮星竟然會喺堂堂議會，就此未經查證嘅消息發言喎！

圖將事件降呢為笑話

嗱，咁挑釁性嘅言論，點會估唔到有反彈？但吳亮星選擇去講，有人相信另有目的，除咗將呢件事變成「鬧劇」，令普通市民將事件降呢成茶餘飯後笑話、一味探究「洗頭艇」到底係乜，似乎吳亮星都有意帶出，如果呢啲未經證實嘅消息唔可以亂講，咁同樣地傳媒又有乜證據話公安有跨境執法？
佢自己都有畫公仔畫出腸，噚日向李波妻子道歉後話，「亂講」對國家不利嘅說話，比佢喺立法會引述朋友嘅傳言更不負責任喎。有建制中人話呀，別人笑星太瘋癲，星笑他人看不穿。咁樣幫國家賣命，阿爺先至最鍾意。唔知咁樣「犧牲小我」做小丑，北大人會有啲乜嘢獎賞呢？

花生友
周二、四刊出