警隊一哥鄧竟成嘅孻仔鄧智兆早前以考第一名嘅成績喺學堂畢業，新紮師兄正式出更，派駐上水警署。雖然一哥講過警隊絕不容許偏私，但身為一哥個仔，一舉一動自然引起傳媒高度關注，日前呢位細鄧Sir開齋接手處理粉嶺一單跳樓case，即刻被傳媒追訪同影相，仲被形容為由同僚簇擁開路，老差骨親自教路。

一哥訓令　程序跟到足

八方當日唔喺現場，實情係點唔清楚，但近排同啲警界朋友吹開水，就證實確係有啲老差骨有好多心得想傳授畀一哥個仔（簡稱一仔）。佢哋話，一仔呢位見習督察到任之後，傳媒睇到實，加上一哥喺警校畢業禮已經講到明警隊唔會偏私，如果個仔做錯亦會秉公處理，所以成個環頭都多咗好多嘢做，因為所有程序都要跟到足。
一仔讀喇沙時動靜皆宜，短跑叻之外仲夾band玩音樂，入學堂又攞到學業成績優異證書、榮譽警棍同施禮榮盾三個第一，連佢𠵱家所屬嗰team人都大有來頭。八方聽講，佢同隊有位經驗老到、綽號「白頭馮」嘅時沙，呢位馮Sir以前曾守過元朗區，處理過唔少大案，份人又好相與，一仔跟佢可以有唔少嘢學，其他同僚都屬fit馬咁話。
有伙記仲同八方講，好多人以為大埔先係新界北總區嘅大環頭，但查實上水先最多嘢睇、最多嘢學，工作量極為繁重，08年倒數緊，都同一時間收到成10幾個call；一仔落嚟呢區，真係好多機會發揮㗎。

斯文有禮勤OT學嘢

佢哋話，一仔幾nice，喺同事眼中算係彬彬有禮嘅新人，好肯學，又主動同人打招呼，而且明白自己係新仔，唔可以丟老竇架，惟有勤力啲，成日落咗更都留喺差館OT向啲師兄請教請教。
不過，有啲老差骨話，驚一仔遇到蠱惑仔時斯文得滯，可能會同啲蠱惑仔講：「先生，唔該你攞張身份證出嚟。」老差骨就話唔只要教佢查案，仲要教佢點爆粗同𢭃啲蠱惑仔喎。不過八方認為，或者人哋咁斯文仲搞得掂啲蠱惑仔呢，話晒𠵱家警隊要講服務質素，以前嗰套未必work㗎喇。