韓國「國民MC」劉在錫出名好人到爆，近日又有韓國網友再喺網上公開劉MC嘅好人史，令「國民MC」地位兼人氣再升呢。

話說，劉在錫早前就跟主持節目《RunningMan》嘅節目組去到首爾某大型商場包場取景，而部分商場員工得知後都好興奮，仲向劉在錫留低紙條，希望搏一搏國民MC喺拍攝時經過會見到，而當中有人就話好支持佢，有人就叫佢簽名，亦有人留低咗腸仔畀佢做零食。

點知，當佢哋第二日返工時，就見到劉MC真係幫佢哋簽咗名，仲寫住「一直幸福」，令佢哋好感動。

另外，劉在石早前喺節目中就提到自己從來都冇同屋企人睇過電視，仲話：「有次過節試過同屋企人一齊睇我主持嘅節目，但佢哋都唔笑，得我一個笑，就喺嗰刻開始我就有「家人心悸症」。」認真搞笑。

而同樣人氣爆燈，被喻為「國民三胞胎」嘅大韓、民國同萬歲早前再同爸爸宋一國一齊拍廣告，三隻小嘩鬼再次喺鏡頭面前展現「怒食」神功，食唔停口，非常得意。