【轉會講場】起孖賀小保加稱霸 9號仔等去羅馬？
蘋果日報 2017/06/26 14:30
羅馬意甲小保加阿甲加高運動賓尼迪圖
賓尼迪圖（中）盛傳加盟羅馬。
小保加上周已經鎖定提早一輪稱霸阿甲，周日佢哋就返到糖果盒球場主場開party，並靠射手賓尼迪圖梅開二度，2:1擊敗聖達菲聯，30戰得63分完成賽季。球隊賽後梗係大肆慶祝，尤其是佢哋今次攞到第32次聯賽冠軍，距離死敵河床只差4次咋！
不過，27歲射手賓尼迪圖踢埋呢場就未必會再披起藍黃戰衣啦，皆因呢位今屆阿甲上陣25場射入21球嘅前鋒，備受多支歐洲球隊垂青，其中以羅馬最有誠意，據報小保加索價1,500至2,000萬歐元（約1.31至1.75億港元）轉會費，睇吓佢喺今年夏天係咪真係登陸羅馬？
賓尼迪圖起孖，為小保加畫上球季圓滿句號。
小保加第32次稱霸阿甲！
前皇家馬德里中場加高（右）都係小保加一員。
糖果盒球場舉行盛大派對。