崔建邦同英文教師女友Jessica、傅明憲、龐景峰同女友Peggy等，噚日到大嶼山出席「全城狗狗行善日2019」活動。曾經被封為「媾女王」嘅崔建邦，17年底同林珊珊細女李怡（野人）分手，幾個月後已被發現拖住新歡買外賣，而當時嗰位「新歡」，就係今次正式帶出嚟見大家嘅Jessica，原來Jessica嘅爸爸係香港劍擊隊領隊崔潤儀，細佬就係香港劍擊代表隊運動員崔浩然。

崔建邦噚日同女友拖住去年領養嘅11個月大唐狗「武藏」參加步行，佢話細細個已經好想養狗，自從舊年搬到郊外住，多咗空間後就開始養狗。問到平時係咪女友照顧隻狗多啲？崔建邦笑住話：「我照顧佢多，女友要教書好忙，最得閒係我，試過啱啱領養時，佢喺圍欄入面大小二便，仲有屋企肉類要放好，只要有雞扒羊骨放喺枱面，我去沖涼轉頭就冇咗，真係日防夜防家賊難防。」

傅明憲全身過敏

另外，傅明憲話啱啱去完帛琉群島潛水返港，潛水時唔知碰到啲乜嘢不知名海洋生物，搞到由臉到全身過敏，又紅又腫：「因為冇直航機，要先飛澳門再轉船返香港，返到嚟之後就去養和醫院打針同食類固醇藥。」佢講到每次潛水都會影相，所以潛得好近珊瑚礁或生物，曾經試過被水母「炸」，手腳仍留有疤痕，但都只係搽藥膏就算，但今次成身敏感就未試過，但都覺得係值得，因為可以第一次近距離接觸到公牛鯊。
撰文：馮仁昭