落錯車，如離開了幸福的高速路……36歲嘅泰利今夏同車路士約滿後依然未定去向，但佢一於少理，先過一個悠長暑假，近日頻頻出席高爾夫球聚會，包括周一「加持」去季車仔隊友、今夏加盟般尼茅夫嘅門將比高域，出席比高域基金會慈善賽，兩人仲同阿仙奴門將施治嚟番張昔日車仔兵合照。

不過，原來泰利打緊golf都有正事要辦，據英國《天空體育》報道，英冠阿士東維拉領隊布魯士上周末同泰利同場打波，正正係商討泰利來季加盟維拉幫手打升班戰嘅可能性！雖然泰利認為自己仍有足夠實力馳騁頂級賽場，選擇「降班」可能有啲自貶身價，但咁樣可以避免倒戈效力22年嘅母會，唔係冇得諗架！