大美人李嘉欣（Michele）一向都落力參與慈善活動，好似最近Michele就參與咗首個emoji創意慈善企劃活動，幫助香港導盲犬協會 （HKGDA）籌款。Michele仲身體力行拍咗條短片，獻出第一次表演「踩鋼線」，十分搞笑。

短片開始時，Michele做晒拉筋運動準備表演，最得意係仲有一班可愛emoji公仔做觀眾，之後Michele順利表演完，所有emoji都拍爛手掌，Michele仲為今次活動設計咗一個心型嘅emoji公仔添！

拍攝當日，Michele其實帶病上陣，所以出現聲沙沙。至於，好多網民睇完片話好想佢再拍戲，Michele話暫時唔會考慮，除非有一個超吸引，唔可以抗拒嘅劇本同團隊。

Michele又話：「今次呢個『#Linkemoji愛‧FUN‧享』活動，想喚醒大眾對導盲犬的認識、接納同支持，同時幫香港導盲犬協會籌款。」而Michele本身也有多年養狗經驗，不過數年前愛犬離世，到依家都冇再養，佢發覺囝囝Jayden都好鍾意狗，所以會考慮去領養。仲有幾日就過年，Michele話佢比較注重家庭生活，農曆新年都會同長輩一齊過。