囝囝Alex Junior（AJ）前年10月出世，那年杜德偉（Alex）已經54歲。

兒子初生的第一份禮物，是Alex的歌——《抱緊處理》，並在專輯序言結尾寫上一句「我陪你長大 你陪我到老」。

轉眼Alex這個新手爸爸，已上任20個月。回想由太太Ice告之懷孕一刻開始，仍然彷似是昨天。

Alex平日型爆，但一提到愛兒，繃緊的臉溶化成笑容。「好開心，其實努力咗幾個月，一路期待緊。結婚初期想享受下二人世界，當開始期待有小朋友時，啱啱好（AJ出現）。」

當初陪太太產檢時，Alex指雖然超聲波素描已大概看到腹中兒樣貌，但仍無法想像親手抱著的感覺。「太太生嗰日，見到醫生抱（AJ）出嚟，我感覺好似拍緊戲，自己好似演員咁，做緊之前想像嘅畫面，個仔就好似道具咁，直至親手抱住，唔係好相信同太太已經有個仔。」

初為人父時，Alex承認有點未習慣，一來AJ還細未有互動，父子似乎有種距離感。直至AJ識笑及牙牙學語，到第一次叫「爸爸」，Alex甜笑說：「當時我唔喺香港，太太錄咗片畀我睇，我諗真係咁好？因為我好錫我爹哋，唔通個仔都一樣？」直至今日，AJ已經20個月大，仍然「爸爸」「爸爸」掛在嘴邊。例如，外婆問他：「件靚衫衫邊個買㗎？」AJ會答：「爸爸。」

如何評價自己做「父親」成績？「從來都冇刻意去諗自已做成點，全因身邊有個太叻嘅太太。我都唔知自己幫唔幫到太太忙。AJ去到我手上，我就係佢玩伴，佢就係我玩伴。」

孩子每分每秒都在長大，因此Alex非常珍惜跟AJ共聚時光，每次出埠，最多也只會兩至三日。AJ出世後，一切都改變了。

例如：帶AJ到公園，見到花草樹木會好雀躍。
例如：駕車時遇上落雨，AJ會驚。

這些生活鎖碎事，都令Alex嘗試用AJ角度看世界，有種感覺，最令Alex動容：「同AJ一齊會諗番我同爸爸相處，有一次我同佢玩，唧佢笑，我就用手『咕嚕咕嚕』佢，我之後先諗番，原來爸爸以前都係咁整我，我又好自然咁去做。」

Alex的父親Ollie Delfino，80年代已跟Alex母親張露分居，09年再婚，杜德偉尊重老父決定，還與兄長杜德智飛抵台灣，為父親婚宴打點。並向送上祝福。兩年後，杜父離世，享年76歲。

「又有一次，我剃鬚，AJ走嚟廁所睇我，不過佢聽到鬚刨聲有啲驚，我就熄咗部機，然後踎底喺佢面前，再笑住嚟剃。我想令佢唔驚。忽然我又記起我細個時，我爸爸都有咁做。」Alex頓時覺得自己變成了自己爸爸，AJ變成兒時的他，好像人生重活了一次。

AJ的出現，令Alex跟家人及朋友多了無盡話題。不少父母都會太溺愛子女而變成緊張大師，但Alex兩公婆在未有小朋友前，已經做好晒心理調節：「有次AJ拎住支卡拉OK神器，好開心咁跑，點知仆親，仲撞到個嘴『爆缸』，當時好驚，但我同媽咪（太太Ice）好Cool話『冇嘢』，其實當時驚到手震拎糖同佢搽止血。」

訪問中，Alex還爆了AJ一個秘密，他笑說：「佢好貪靚，成日照鏡，有時照照吓仲會錫落去，戴頂帽靚又會照，我成日都望住佢同影低。」手機裡全是AJ。

去年父親節，Alex要離港工作，令他錯過了與兒子第一個父親節，今年亦然，但Alex當晚會趕返香港，一家團聚。

「父親節只係多一個藉口，令一家人齊整食飯，其實每日都玩得好開心，而今年太太嘅妹妹有咗，所以會有一位準爸爸，我呢位爸爸同埋我外父一齊慶祝。」

至於對AJ期望，Alex諗都唔諗：「我期望佢次次食飯快啲吞咗啲飯，成日食個幾鐘，媽咪好攰，想佢健康啲快高長大，至於其他，遲啲先諗。」

採訪：馬建華
攝影：陳慧安
拍攝：馮嘉銘
場地鳴謝：觀塘帝盛酒店

相關文章：
【爹哋=萬能俠】妹妹Sukie向父求婚 鍾舒漫自嘲在騙案中成長
https://bit.ly/2JQjfuV
【父子道場見】成日叫個仔搬 72歲夏雨感觸：人老咗好麻煩，要人照顧…
https://bit.ly/2JG9O1O
【微動画】愛要及時 別讓父親節留憾
https://bit.ly/2JMU7Gp
【15歲仔拒攬錫】55歲硬漢錢小豪：我一早預咗有被遺棄嘅感覺
https://bit.ly/2K0k0l2
【前妻改嫁兒子改姓】錢小豪父子分離逾20年：想儘量修補番
https://bit.ly/2lgCu2S
【太太患腎病】帶12歲仔開檔 黃翊復出做歌手：爹哋唔係流㗎
https://bit.ly/2t1y0kL

精選娛聞，喺晒《娛果》
http://fb.com/appledailyent