勇者無懼，騎士控衞K艾榮（Kyrie Irving）着得出做得到！周二NBA季後賽東岸決賽第四場主場迎戰塞爾特人，艾榮着住寫有「FOR THE FEARLESS ONLY」嘅特別版波鞋，喺「大哥」勒邦占士（LeBron James）受個犯困擾下孭起球隊，貢獻42分帶領騎士一度大落後下重後趕上，終以112:99贏波，總場數領先至3:1，晉級總決賽在望。

占士半場四犯照贏

I湯馬士（Isaiah Thomas）因傷收「咧」，但塞爾特人將士用命，今場依然有唔錯表現，四位正選都有雙位數得分，最多曾經領先16分，加上占士職業生涯首次喺第二節已經四犯，客軍形勢大好。不過，呢個時候艾榮就話輪到佢上演show time喎。
艾榮由第二節尾段開始着火，第三節完全忘我咁10射九中獨得21分，尾段一次高難度上籃攞分後，因扭傷足踝倒地，但咬緊牙關將鞋帶綁實之後又繼續比賽，博得全場掌聲。進入最後一節，形勢已經完全傾向主隊，占士喺下半場保持集中冇再犯規，全場得34分；而大前鋒路夫（Kevin Love）都貢獻17分17籃板，騎士最終有驚無險擊敗塞爾特人，叫糊入總決賽。
賽後，占士都承認艾榮已經屬於巨星之列：「佢的確係好特別，我好開心可以退後一線睇佢表演，佢亦係為喺呢個舞台發光發熱而生。」