吳少芳(Jodi)因為25年前一場車禍致四肢癱瘓，沒有自理能力，失去最在意的私隱。不過，她從來沒有想過要了結生命，以前沒有，現在更加不會有這個想法。Jodi帶笑說：「我由頭到尾都覺得自己會好番，係會完全好番。同埋我係無諗過要死，因為我16歲嗰年，我哥哥18歲撞車昏迷7日死咗，我好傷心，所以我嘅心態係唔可以令自己突然離開呢個世界，因為全家都會好傷心。」

除自己擁有正面思想，Jodi不時出席講座，希望正能量能感染感到不幸的人。她說：「死好似好簡單，但唔死嘅話，有好多方法可以解決問題。」Jodi不諱言，最初聽到治療師叫她揀選輪椅，確有一刻感到難受，更哭了良久。她說：「我見到人人出院都係借輪椅，我要買？即係要長用？不過我花咗兩日時間就接受咗。」

Jodi接受訪問曾經講過，為不想要家人勞心勞力照顧她，當年她故意離家自住，身邊只有一個家傭姐姐照顧。Jodi謂：「我唔想父母擔心，尤其係爸爸，我唔想一個男人要咁樣照顧我，直到有一年我聽到佢哋肯去旅行，我就知道佢哋終於都放心我！」

用生命戰士來形容Jodi絕不誇張，但每當提到家人，表現「硬淨」的Jodi即兩眼通紅，哽咽說：「最幸運係有家姐、妹妹關心，令我覺得最豐盛，錢就多有多使，少有少使，唔相信冇飯食，基於自己有個咁團結家庭，我一講家人就會激動，因為真係好豐盛。」

Jodi自言是無神論，相信天意，從小便覺得一切天注定，以前細個覺得好幸運，好容易開心。她說：「我唱歌唔係好好，外形又唔得都做到歌手，所以個天係好同唔好都俾你，有啲嘢要『硬食』就要接受，好似要坐輪椅咁，唔坐唔通躝地？都要接受啦！同埋自己好叻適應，以前去露營有朋友覺得好辛苦，我自己就覺得去到就要接受，地下有石咪摺厚啲件衫攝住囉，總有方法解決問題。」

問Jodi可有打算找個「伴」？她說：「隨緣啦！唔會揾，個天會安排，以前個天都俾咗好多我，但我冇好好珍惜，自己催毀咗。以後有冇唔知，唔會話唔要，但唔會刻意揾，睇緣份，唔抗拒，但都唔恨，而且自己都一個人生活咁耐，都有少少潔癖。」

採訪：小米、懷鈺
攝錄：馮峰
攝影：陳慧安
後期：Roy
場地：La Villa