渣打裁員之日，剛好與一班老友在皇朝會吃晚飯，其中一位地產N以前係銀行分行經理、按揭部門主管，對銀行非常熟悉，尤其精通按揭業務。地產N聽到渣打裁員，喟然而歎：「家陣做銀行真辛苦，我大學畢業之年，入銀行做trainee，學足信貸業務全套，未夠五年已經做分行經理，獨當一面。現在啲畢業生入到銀行都學唔到乜嘢啫，銀行就逼佢哋去考試、考CFP，考到就上前線推銷佢哋自己都冇錢買嘅基金、保險。結構性產品，人人孭quota，壓力甚大，你話做足五年，都只係識推銷，點做銀行家呀？交唔到數，或者年事日高，或者考唔到CFP，或者人工太高，就會有同一個下場：炒魷！」

地產N兩年前轉入一間銀行做部門經理，返工第一日，上司與人事部經理一齊召見佢，對佢講：「現在時代唔同，你做主管，冇CFP牌唔得，三個月之內你考唔到，我哋就會請你辭職！」地產N為之媽媽聲，因為見工之時，並冇講到呢個條件，否則佢一定唔轉工啦！雖話係大學畢業，但年近五十，已經冇考試將近三十年，一下子要同班年輕手下一齊讀書，一齊考試，點搞呀？呢間銀行嘅訓練班做到十足十，個個禮拜都有一次CFPmockexam（模擬考試），地產N考咗四個禮拜，次次包尾，自己雖然係部門主管，講經驗、人脈，叻過佢班後生手下多多聲，但冇牌就冇得講，惟有立刻辭職，轉行做地產。佢一位愛將未夠三十歲，為咗考牌，新婚之日一路刨書，喜酒擺完又攬住本書至凌晨三點，幾乎唔識洞房。地產N現在退出銀行界，成為銀行嘅銷售對象，地產N話：「入到銀行，啲有牌年輕女士猛咁向我推介結構性存款，睇得出係信心不足，經驗不夠，只識背書（背產品說明），我都戥佢辛苦！」