今日係4月3日，華華枱頭個日曆寫住宜交易訂婚，忌造廟放水，基本上唔係咩大凶日子，但無論大戶散戶都應該醒醒定定，因為，「跌市明燈」秋官套新劇《潮爆大狀》今晚首播，華華祝願個股市唔好有咩衫長褲短、大小股災，等大家平平安安迎接復活節，否則除咗秋官下半生要繼續孭住呢個朵之外，分分鐘搞到小股民殺入電視城請願要腰斬套劇，甚至以後唔畀佢拍劇就唔好啦！
有啲讀者可能會問：「使唔使咁驚呀？」唔係華華導人迷信，炒賣股票其實即係賭錢，賭錢就一定要信邪，千祈唔好鬥氣！睇番秋官啲「往績」，由1992年《大時代》丁蟹開始，十二套劇出街，有九套個市跌，時裝同古裝比例係5：4，雖未至於逢出必跌，但命中率都幾高，而今勻呢套時裝劇《潮爆大狀》呢，據聞舊年10月試造型嗰日，恒指都跌二百幾點，上個禮拜出嚟宣傳，個市又跌111點……唔好話賭仔姓賴，啲數字確實係幾嚇人！

之不過咁，大家可以理性啲咁睇，4月份多假期，基金佬放假，啲上市公司又公布晒業績，跟住又例牌五窮六絕，集合晒所有壞因素，基本上係例淡嘅季節，啲分析員上個星期都講咗第二季個市唔樂觀啦，唔可以賴晒秋官嘅。所以華華認為，求其個市唔冧，都應該還得神落啦！
李華華
讀者如有任何意見或報料，歡迎發送電郵至[email protected]。