結婚7年嘅陳琪同胡諾言，已經有兩個可愛嘅囡囡胡芷苓同胡芷悠，今日有報道話陳琪再度有喜，佢接受傳媒訪問時承認已經有咗五個月，覺得呢個BB係個天賜俾佢哋，佢同老公都好心。今朝早，陳琪同老公胡諾言就趁住學校假期，帶埋兩個女去坐昂平360纜車，佢仲喺微博到貼圖晒放閃，仲留言話：「今天學校假期，帶兩個老闆出外走走，多謝天公造美，天朗氣清，心曠神怡，昂坪360水晶車又真係好定！」

陳琪今日好開心咁回覆傳媒，親口證實已懷孕五個月。其實前年曾經小產，當時佢要接受人工流產手術，佢話：「個手術(流產)正常人只要15分鐘，但當時我就做咗3小時，流咗好多血，差啲連子宮都要切埋，好在最後都保得住。之後同老公都無諗過再懷孕，今次有BB真係意外驚喜，覺得係個天賜嘅，我同老公都好開心。」

經歷過流產，陳琪話：「平時人哋懷孕三個月就可以開心Share，但我今次真係想陀穩啲，知道BB健健康康，先同大家公佈呢個喜訊。」已有兩女嘅陳琪，問佢有無生仔壓力？佢即答：「以前都有壓力，可能朋友都會問我呢胎係仔定女，經歷過事情(流產)，我覺得係仔係女都會咁錫囉！」咁今胎老公係咪特別緊張？佢即笑住話：「緊係啦，連買餸重啲都唔俾。」至於老公係咪錫晒佢，陳琪答得更開心：「緊係啦！我話晒喺屋企都好重架。」

陳琪仲好開心咁話將有個五人大家庭，佢笑話「好多朋友會好奇問『你哋養唔養得起呀？』惟有努力啲賺錢囉，唔好搬大屋，反而要搬細屋，一家人慳啲使。」