【財經評論】寫千字拆賬1仙都發達(上)

蘋果日報 2017/08/22 18:58

網絡小說閱文集團財經評論

有種發達方程式叫「人口抽水法」,通常被職場奴工發酒癲時提起,邏輯如下:「那,我同你講呀吓,香港有七百幾萬人,如果畀我度到條絕世好稿,每個人畀我賺佢一蚊,夾埋都成700幾萬,到時我就真係秒秒鐘幾百萬上落喇!哈哈哈」中港兩邊跑的奴工格局會眼光相對宏大,「大陸13億人口,唔洗多,只要一成人肯畀一蚊人仔我,我都發過豬頭呀!」
難做唔代表無人做到,最新鮮滾熱辣的個案是騰訊(700)旗下的網絡文學平台閱文集團的一眾大神級及白金級作者。
根據招股書顯示,截至去年底,中國網絡文學用戶總數有3.33億,而閱文集團旗下及相關平台月活躍用戶總數1.75億人。雖然月付費用戶總數只有960萬人,即平均18個用戶,只有1個肯畀錢睇書,佔中國總人口不足1%的每月進貢成就了閱文集團。
要知道內地網絡小說收費低到近乎賤價,就是這樣聚沙成塔形成過百億元的市場。
以閱文集團旗下的大型網站起點中文網為例,1元人民幣(下同)兌換100個起點幣,而收費小說逐章賣,每1,000字最平賣3個起點幣,即3仙。收價低到嚇親人,除了因應國情之外,全靠讀者基數、作家夠勤力,以及互聯網複印成本近乎零的特點。
招股書未有明確公佈給予作家的稿費計算方法,而網絡盛傳簽約作家每1,000字拆賬介乎1仙到1.5仙,至於無簽約的作家則是零稿費。
以一章小說字數介乎3000字至5000字、按拆賬下限1仙計算,基本上起點中文網的簽約作者每日都會寫出一章,假如有10萬人天天追看,那這位作者每月收入為9萬元到15萬元,未計「打賞」、網站獎金、作品改篇影視作品分紅等。
今年初,閱文集團曾公佈發放稿酬金額近10億元,排名首位的作家稿酬逾億元。不過,學元秋(雀聖)話齋,網絡小說界無錯係遍地黃金, 但黃金之下有好多屍骸。下回再續。
記者:陳東陽