當年今日
關於我們

豪花二百萬入門級太空之旅

蘋果日報 2013/09/19 06:00


一趟Moonwalk要百幾億港幣,尋常打工仔有生之年的確冇可能儲到,來個入門級的太空旅行、跟月亮近距離打照面如何?最快2015年成行,價錢二百萬……有找。

眾所周知最野心勃勃搞太空旅遊的公司,有由航空奇人布蘭遜率領的維珍銀河(VirginGalactic),經過幾年來高調銷售價值25萬美元的「團花」,目前報名人數已達600人,知名巨星如里安納度狄卡比奧、「新賈伯斯」艾希頓庫奇以至霍金都是準太空人,在香港也泊到美麗華大碼頭幫忙推銷。

另一邊廂加入搶灘的SXC(SpaceExpeditionCorporation),知名度爭少少,對香港人來講,勝在夠埋身,連亞洲區總部都揀在香港落腳,擺明做大中華生意。2015正式首發的太空之旅,會帶乘客飛行至海拔103公里,越過被視為太空與地球分界線的卡門線,比平日搭飛機高約9倍!呢個高度,夠你俯覽三分一個地球,透視包圍地球的淡藍色大氣層,如果選擇於清晨或傍晚出發,仲有機會同月亮Moontalk。知你懶搞行程,SXC仲提供配套,幫你Plan埋Trip,港幣168萬團費,包住一晚半島酒店、私人飛機來回香港及加勒比海庫拉索島航天發射站、四晚當地五星級酒店、迎賓禮物、證書、腕錶、以及將閣下大名刻喺發射站紀念碑等等,完全係五星級豪華團待遇。168萬,用嚟上一次太空,定係儲起畀太古城首期?真係好難揀喎。