兩名貧困無依長者，心中各有願望。年過六旬患有矽肺病的梁伯，飽受牙病折騰數十年，盼望重新鑲嵌一副假牙，吃一口飽飯；九十五歲獨居的林婆婆，哮喘且行動不便，害怕出事時求助無門，望能在家中安裝電話及平安鐘。善長點滴的捐款，可助兩老願望成真，改善生活。

個案一： 患矽肺病氣虛體弱的梁伯說：「人老咗，精神真係差好多，近排周不時頭暈眼花，行多幾級樓梯都氣喘，加上有矽肺病，成日咳同好易感冒，所以就算呢幾日天氣唔算好凍，我喺屋企都閂晒啲窗同着多件衫，怕病咗就麻煩。」

大意摔毀假牙
梁伯原籍廣東惠州，早年移居香港後一直從事地盤工作。約十年前，梁伯被證實患上矽肺病，身心皆受痛苦。「我發現個病之後，喺地盤做多三年，就冇氣力捱落去，要靠賠償金生活。個病重令我脾氣好差，搞到同老婆離咗婚。」梁伯向記者訴說。
梁伯晚年生活孤苦，早前摔毀了使用多年的假牙，以致連日來只能進食稀粥。「我細個喺鄉下唔注意牙齒衞生，搞到二十幾年前啲牙差唔多爛晒。早幾年我返大陸鑲咗副假牙，貪價錢平又食到嘢。點知前排我除副假牙出嚟洗嗰陣，唔小心整跌落地，副假牙即刻斷開兩截，我用萬能膠都冇辦法將副假牙黐番實，𠵱家惟有日日煲粥食。」
梁伯續稱：「我好想鑲副新假牙，但去本地慈善團體開設嘅牙科診所，都要畀五千蚊。我每個月靠賠償金勉強生活，冇辦法攞咁大筆錢出嚟，惟有希望有人幫我！」