呢排香港各專利巴士公司開始引入符合歐盟IV型條例嘅環保巴士，我車報員都覺得佢哋抵讚；無錯，雖然家陣投入服務嘅數量唔多，但至少佢哋肯為環保盡一分力吖！
其實，以唔同款式出現嘅環保巴士，喺歐洲等地早已盛行，除咗大家熟悉嘅天然氣同埋FuelCell之外，Hybrid混能巴士亦係其中一種主要環保車款。嗱，就好似德國Mercedes-Benz嘅CitaroGBlueTecHybrid混能巴士咁，佢嘅機械配搭以柴油引擎同交流電馬達組成，不過車輛嘅動力只會源自交流電馬達，而柴油引擎只會喺設於車頂嘅蓄電池電量下降嗰陣，先至會起動，變成發電機為蓄電池充電；此外，當制動系統運作嗰陣，動力亦會轉化成電能儲於蓄電池內，以減少柴油引擎運作嘅次數，從而減低行車時嘅廢氣排放量，以助改善空氣質素。

就因為咁嘅緣故，CitaroGBuleTecHybrid混能巴士就喺剛舉行嘅WorldMobilityForum入面，奪得2008DEKRA環保大獎；廠方高層AndreasRenschler喺領獎嗰陣話，CitaroGBlueTecHybrid環保巴士能夠獲獎，主要係因為廠方設計咗最新同最環保嘅技術，令到好似市區等呢類人口密集地方嘅空氣質素得到改善。吖，唔知香港嘅巴士公司，有無計劃引入呢款咁環保嘅巴士呢？

記者：車報員