打唔成風但天雨路滑，揸車都真係要額外留神。好似噚晚(6月6日)8點幾，西九龍走廊向尖沙嘴方向，就發生咗單交通意外。有個的士司機揸住部紅色市區的士，唔知佢係咪當咗部的士係紅色跑車，喺橋面行行吓突然玩起飄移上嚟，最弊係部的士唔受控，跣住胎甩咗幾個車位之後，就調埋頭停咗喺路中。

原本的哥以為部的士都好似無乜損毀㗎，佢仲打死火燈倒車，諗住調番頭咪離開囉，點知部的士都未褪好位啫，尾隨一架紅頂小巴就駛到，結果避都無得避，小巴司機收唔切，車頭直撞的士左邊車身。就係咁，的哥因為腰痛要送院治理，真係傷囉。

市民蔡先生當時喺西九龍走廊附近大廈嘅公司返工，佢話聽到撞車聲，望落佢就見到呢單意外，公司閉路電視仲影晒事發經過。佢話好彩之後陸續有私家車駛到現場，各位司機都收慢停車，無再串燒啫，如果唔係可能就大件事。

警員事後接報到場調查，63歲姓陳的士司機同70歲姓吳小巴司機，吹波波都錄得0度，證實無飲酒。不過的哥就同阿Sir講，係閃避切線車輛失控出事喎。唔係卦？閉路電視明明影到係佢係自炒喎，當時的士附近都無其他車。

你敢爆，我敢獎！ 即Call《蘋果》24小時爆相爆片熱線 ：63836568