阿倫雖然啱啱喪父,近日忙於辦理父親嘅後事,但佢話應承過人哋嘅事一定要做,因為係佢爸爸教嘅,所以前晚佢都有嚟。譚老伯今日設靈,不過阿倫一早又應承咗出席雷頌德嗰個公益金音樂會,問阿倫會唔會取消唔去音樂會,佢都係嗰句:「應承咗人嘅嘢一定要做,上去唱都係半個鐘,唱完咪返去守夜囉,好近啫,唔去老竇仲唔開心。」
此外,平時行蹤飄忽嘅關淑怡,前晚就唱咗《患難見真情》一隻歌,不過佢冇喺台上講嘢,只係送個飛吻畀蔡國權啫。而小鳳姐大前晚突然出現,同蔡國權激動擁抱,之後兩個都哭成淚人,前晚小鳳姐仲大叫蔡國權加油,又話希望佢康復之後,第一首作嘅歌可以寫畀佢喎!