幾時都話，踢波叻唔代表教波叻，英倫球壇周四又有辦你睇，就係踢過列斯聯同利物浦等球會嘅38歲澳洲一代名將基維爾。基維爾喺2015年考獲歐洲足協教練牌後，同年7月接掌屈福特U23領隊一職，可惜球隊自去年10月以來只係贏得兩場波，仲先後試過1:7輸畀卡迪夫城、淨吞葉士域治8蛋等恥辱大敗，最終喺周四烏紗不保。

不過，基維爾呢兩季嘅努力都唔係冇回報，正如佢喺社交網站話齋：「好遺憾我要同屈福特U23分道揚鑣。不幸地好成績並冇企喺我嗰邊，但我非常自豪有3位球員有機會喺一隊上陣，另外有5位球員列入大軍名單。」雖然屈福特今季確係傷兵滿營，但19歲後衛班頓美臣（Brandon Mason）已經喺年初主場對熱刺嘅聯賽後備上陣22分鐘，證明有一定實力，基維爾都叫做「老懷安慰」囉。