今季開局唔多順利嘅十三屆冠軍騎師韋達，苦戰第六個賽日，終於喺尋晚（20日）谷草戰，憑自己嫡系馬「狀元才」打開今季勝門，為自己重振聲威。

望番周日（24日）排位表，原來十三少呢日五匹座騎都係屬自己私家馬，或者上仗剛騎完嘅馬，唔通呢位大師傅終於肯認真對待自己嘅成績？

今朝早（21日），雖然鏡頭捕捉唔到十三少同有合作嘅霍利時有咩交流，但係前者全朝都極活躍。

唔單止同今期無合作嘅苗禮德一齊行草地飲咖啡，仲同今期有合作嘅廐主葉楚航指手劃腳地密斟，咁嘅動靜加埋隻隻都係自己騎過，十三少呢個周日隨時乘勝追擊。

韋達周日沙田日賽座騎
場次　馬匹　　　馬房
二　　快趣的　　霍利時
四　　正藍旗　　霍利時
五　　紅駿之星　葉楚航
八　　巴基小子　告東尼
九　　原居盟友　葉楚航