SunFun日:闖50萬星象館
衝出地球看星
去太空館,多數都係睇天文電影,得番一兩場係睇星星,鬼咩,年紀大機器壞,入面嘅燈泡、摩打不在狀態都好自然嘅,行數碼嘅STARLAB就無呢個問題,12星座、8大行星、仙女座星系等,你想朝早睇、落雨又睇都無問題,STARLAB可以投射喺全天域嘅半球形FullDome入面(可容納50人),喺入面一抬頭,就好似漫天星星扯咗落嚟咁樣,好壯觀。除咗抬頭睇星,仲可以摸擬坐太空船,由飛離地面一刻開始、擦過變成一線一線的宇宙星體、最後見到十萬光年遠的行星,坐喺180度的空間入面跟足全程,好有代入感。
除咗可以時光倒流,仲可以衝出地球,唔單只返回從前,再去埋世界各地,觀察不同文化的星空。星河科研社主席Savio話,試過輸入Data,計算番耶穌出世係邊一日,因為傳說話,嗰日喺伯利恒西邊有粒好光嘅星,其實係金星同木星近到肉眼分唔開,得出結果係,公元後30年間,只有公元2年6月17日,可以喺當地見到呢個奇景咁話。
既然可以入Data回到過去,想Real-time即時睇吓呢一刻啲太空船,去咗邊睇到乜都無難度,只要太空總署有發放資料上網,駁去STARLAB即時運算,就可以留守地球做太空人。坊間千零蚊嘅星空投影機,都只係睇吓流星;太空館啲燈泡摩打又唔會識計數,邊會好似STARLAB咁巴閉,帶你上天下地又回到過去。
Savio表示,政府天文台做緊嘅其實係氣象,而非天文(觀星),台灣、日本等都叫佢做氣象局(廳)而不叫天文台,叫「天文台」只因中國歷史上把天文、氣象兩者混合,而全港第一個觀星(天文)嘅天文台,就喺79年由香港中文大學建成,到𠵱家有27年歷史!佢有支強力望遠鏡,再加個可移動上蓋保護住支鏡。
睇飽就玩啲手作仔,教你整三國時代通風報信的孔明燈。孔明燈亂放係違法嘅行為,但我哋今次放嘅係回收式孔明燈,放咗上去扯得返轉頭就無問題,放心許願喇。
剪好長方形底、三角形頂的紙樣後對摺。然後放在8張對摺好的紙上,依紙樣裁出。
8張紙攤開後拼貼好,在上面寫上願望。再在捲好圓形的燈底,繫上鐵線,放上棉花或威士及回收繩。
玩咗咁耐,最關心就係個團包咗乜嘢食啦。豐富囉!半自助餐晚餐,沙律、餐湯……統統任食,環境自然Relax,仲有以下3個MainCourse可以任選其一。
呢個Sauce比較清啲,配住鮮味蝦仔,愛口味清淡的最啱食。
星河科研社——情迷星星孔明燈
活動︰製作星圖、參觀數碼立體星象館、DIY孔明燈、享用半自助晚餐、天文台觀星及放孔明燈許願
地點︰大埔滘紅林路2號嘉里白鷺湖互動中心
團費︰$168(12歲以下)/$198(12歲或以上)
查詢電話︰81060660
網址︰www.astro.hk
備註︰30人成團,60人可包團,上限為120人。