擅長玩爆人個腎的李健宏(Kevin Boy)，繼去年夥拍Super Girls的吳嘉熙一齊《玩X爆泰國》後，今年再度「玩X爆」，不過地點就轉到冰天雪地的日本北海道知名滑雪勝地二世古(NISEKO)，更找來周秀娜(Chrissie)合作拍攝新一輯《玩X爆二世古》，節目將在本月11號(星期一)晚在ViuTV播出，日前KB就到銅鑼灣接受《蘋果》訪問，分享拍攝點滴。

KB表示自己2015年才首次接觸滑雪，而且是公司太娛樂的CEO唐才智(Alex)慫恿下才肯學滑雪，豈料一試愛上，開始每年都飛到當地滑雪，終於在年初決定拍攝今次節目，內容有介紹當地有幾好玩和一些資料性內容，亦少不了他們滑雪的片段。

講到拍攝過程，KB稱：「其實拍攝今次節目都好有難度，因為十集入面全部背景都係雪山，最初我搵周秀娜嘅時候都係同佢講話一齊去滑雪兼會拍嘢，佢起初都有啲擔心，但我話你當我哋去玩先，唔使理拍嗰方面，就係咁先可以畀觀眾睇到娜姐嘅另外一面。」

KB透露或許外界會認為娜姐是一名女神，但其實私底下她相當玩得：「佢儍儍地㗎好玩得，而且好多時都係素顏上陣拍嘢。」又表示知道娜姐平日不會下廚，特登逼她煮飯：「我哋整咗個『二世古中女廚房』畀娜姐，買晒材料迫佢煮一餐畀我哋食，結果餐飯都OK食得落嘅。」至於Alex情況亦一樣，經KB半推半就下以嘉賓主持的身份一同出鏡，KB表示其實在二世古拍攝時撞到很多同去滑雪的朋友：「拍拍吓見到Eric Kwok，而且我大老闆周焯華又喺度，所以又拉埋佢哋嚟拍下。」

另外，KB又表示為了今次節目特地製作新歌《最緊要貪玩》，他稱靈感來自許冠傑的《最緊要好玩》，他說：「 我由《玩X爆台灣》到《玩X爆泰國》都有主題曲，所以今次都做咗一首，雖然站在公司立場係好嘥錢，但我同公司講節目內片會播，而且我仲剪咗個MV出嚟，所以係一個好好嘅宣傳。」

採訪：曹家誠

------------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9