五色除咗有靈芝，日常嘅飯菜原來都要有五色！
近年營養學家均主張「一日五餐，日食五色」嘅飲食習慣，好似今次示範五色菜嘅李太，都係為咗個寶貝女而設，皆因佢話要KeepFit，餸菜自然要清淡啲，但又要講求營養均衡，所以自創咗以下嘅3餸1湯，齋睇賣相已經夠晒開胃。老媽子，今餐識做啦？

記者：謝翠玲
攝影：何家亮
示範：屯門讀者李太

Red1
牛肉炒菇番茄杯　雞髀菇唔使出水

價錢：$15/3人
需時：15分鐘

番茄炒牛肉家常到不得了，卻是李太女兒美鳳從小到大百吃不厭的菜式，雖然阿女無話食到厭，但李太都不時會改良菜式，如將大肉茄挖空做杯裝炒番茄，連個生嘅番茄杯都食埋就最有益。

材料

牛肉4両、生抽半茶匙、老抽1/3茶匙、糖少許、生粉1茶匙、油半茶匙、雞髀菇半隻、大肉茄3個、葱1條、水半杯、茄醬1茶匙

簡易法

1.用生抽、老抽、糖、生粉和油醃牛肉，雞髀菇切薄片；

2.兩隻大番茄切頂，挖出茄肉和汁，剩下的番茄切粒；

3.燒紅鑊，先炒牛肉，加入雞髀菇、番茄粒和葱同炒至牛肉熟，加水、茄醬煮滾，以少許生粉開水埋芡，即可盛入番茄杯內。

貼士：

雞髀菇沒有鮮菇的怪味，直接炒食會比事先出水再炒有彈性和香味。

Yellow2
芒果咖喱蝦　香而不辣

價錢：$28/3人
需時：15分鐘

芒果同蝦超好食，但剝皮剝殼就好鬼麻煩，李太索性將蝦同芒果起肉直接炒食，加啲咖喱粉，只覺香而不覺辣。

材料

海蝦半斤、鹽、胡椒粉少許、芒果2個、蒜茸、咖喱粉各1茶匙、糖少許、水2湯匙、生粉半茶匙

簡易法

1.海蝦去殼，挑腸洗淨，以少許鹽和胡椒粉略醃；

2.芒果去皮，切粗條備用；

3.爆香蒜茸，放入蝦炒至轉色，加入咖喱粉、糖、鹽和水，將生粉以少許水開勻作芡，收乾汁料。熄火，將芒果條放入拌炒幾下即可上碟。

貼士：

芒果肉腍易爛，不利高溫烹調，所以在蝦熟後才加入略炒，待芒果沾上醬汁味道便可。

Black&White3
魚肉豆腐釀鮮菇　「老少平安」改良版

價錢：$12/3人
需時：12分鐘

阿女日日話KeepFit，搞到啲菜日日都咁口寡唔係好掂，李太將傳統嘅「老少平安」豆腐魚肉搞搞新意思，用鮮菇釀起來蒸，最後淋上嘅有味芡汁令整個菜式生色不少。

材料

布包豆腐半件、鯪魚肉4両、鹽1/4茶匙、生抽半茶匙、胡椒粉少許、鮮冬菇12隻、雞粉1茶匙、糖1/4茶匙、生粉1茶匙、麻油少許、水1杯

簡易法

1.豆腐壓爛，跟魚肉混合，以鹽、生抽、胡椒粉略醃；

2.鮮冬菇去蒂，釀入魚肉豆腐，放入深碟中；

3.釀冬菇隔水蒸8分鐘，倒去蒸出的水。將雞粉、糖、生粉、麻油和水混合，煮滾成雞湯芡汁，淋在釀冬菇面即成。

貼士：

豆腐攪得多會出水，跟魚肉混合時只需輕輕拌勻，不要攪得太稀。

Green4
西洋菜肉丸湯　渣都食埋

價錢：$10/3人
需時：15分鐘

西洋菜滾肉片湯雖然清甜，但每次煲完湯的肉片都嚡過張砂紙，李太改用免治豬肉做肉丸，出味又較易入口，加上近期都算靚嘅西洋菜嚟滾湯，阿女飲到渣都食埋！

材料

西洋菜半斤、免治豬肉4両、鹽1/4茶匙、糖少許、生粉半茶匙、生抽1茶匙

簡易法

1.西洋菜浸洗備用，免治豬肉加入糖、鹽、生粉和生抽醃味，拌攪至略帶黏性，以湯匙挖成肉丸；

2.煲6碗水，水滾後加入肉丸，以大火煲滾約6分鐘；

3.待肉丸熟透，加入西洋菜，滾5分鐘，加鹽調味即可。

貼士：

肉丸較易散開，放入水前可用手再壓實定形。

5色各取所需

每餐分開攝取五色菜，可避免營養失衡問題：

黑色食物　最有營養

包括茄子、冬菇、黑芝麻、黑糯米等含鈣、磷和鋅，其營養一般高於其他顏色的食物。

白色食物　幫助發育

包括豆腐、牛奶、魚類等食物，大多含豐富蛋白質和鈣質，對發育和骨骼健康也有益處。

黃色食物　改善新陳代謝

包括芒果、粟米、南瓜和香蕉等。一般黃色食物可提供熱量、改善新陳代謝和幫助消化。

綠色食物　維持鹼性

包括所有蔬菜，含有大量纖維素、維他命和礦物質，可維持人體內的鹼性特質。

紅色食物　有振奮作用

包括番茄、紅辣椒、紅蘿蔔和各種肉類，主要供給維他命和礦物質，亦有振奮精神的作用。