容祖兒日前到台灣為國語歌《亞亞亞》拍MV，工作人員在片場搭咗一個超豪舞台拍攝，祖兒帶咗6大箱戰衣畀導演挑選，最後換咗4套靚衫上陣，其中一套係銀閃閃嘅露肩裝，現場1,500盞燈射住祖兒嘅「肋骨胸」，笑言拍到人都晒黑咗，而且勁歌熱舞跳到全身濕晒，自嘲：「臭臭der。」因為成個背脊都係汗水，好想快啲收工沖涼。

呢首歌由黃偉文（Wyman）填詞，講起歌曲背後有段故，話說早排祖兒同謝霆鋒到俄羅斯睇世界盃，咁啱Wyman都好鍾意睇波，兩人討論到「雖敗猶榮」嘅觀點，仲決定喺首句歌詞上，用咗祖兒廣東歌《16號愛人》嘅經典歌詞：「謙卑的人 只要做亞軍 仍然很興奮」。

對自我要求好高嘅祖兒嚟講，呢首歌反映佢嘅生活態度：「短短比賽時間裏勝利唔只一種，謙卑同盡興就係魅力，亞軍都可以優雅地雖敗猶榮！」

精選娛聞，喺晒《娛果》
http://fb.com/appledailyent