葉劉形勢一片大好，一於玩讓賽上北京睇奧運暫停拉票幾日，其他候選人就冇咁輕鬆，自由黨田二少有贏面卻唔穩陣，噚晚同助選團去奧海城外，一邊睇大電視轉播奧運開幕儀式一邊拉票。
公民黨九東候選人梁家傑，噚日就去到觀塘某商場與眾同樂，因為個商場有好多活動迎接奧運，相信唔少街坊會去商場，佢去屋邨洗樓都作用不大，索性轉戰商場，可能仲見到多啲選民。佢到場後坐喺前排，着上件「中國加油」紅色T恤，仲high過為自己拉票。
民主派之前估計奧運熱潮會冲淡選舉氣氛，其實動動腦筋變通吓，都唔係冇辦法嘅，唔通真係蹺埋雙手坐喺度等運到咩？公民黨另一候選人，出選新東嘅湯家驊，噚晚就同一班助選團返屋企開會，奧運開幕禮舉行時，大家暫時放低工作睇電視，話晒係百年一次大場面，點捨得唔睇呀！