【換金屬左膝蓋】黃淑儀出院留4吋長傷口 告誡女士勿穿高踭鞋奔跑
蘋果日報 2019/11/06 17:53
黃淑儀全膝人工關節置換手術
- 黃淑儀（GiGi姐）因左邊腳的半月板撕裂，早前將左膝蓋骨鋸走，更換金屬全膝。
- 今天她由老公徐景清陪同下出院，她表示傷口仍有點痛。
- GiGi姐表示要休息三個月，一個月後要覆診，再評估右邊膝蓋是否需要做置換手術。
- GiGi姐坦言要寄語後生女，不要穿高跟鞋跑。
黃淑儀（GiGi姐）因左邊腳的半月板撕裂，早前在佛教醫院接受全膝人工關節置換手術，將左膝蓋骨鋸走，更換金屬全膝，休息了6日，今天她由老公徐景清陪同下出院，步至醫院停車場候車時，醫院職員示意不准拍攝，GiGi姐只好撐着拐杖、由老公攙扶，一步一步行到停車場外上車。
受訪期間，精神抖擻的GiGi姐拿起左邊褲管，展示4吋長的傷口，她表示傷口仍有點痛，並笑言手術後第二日就要落床，因她不能在床上去廁所。問到兒子徐肇平會否接她出院？GiGi姐說：「佢淨係嚟探我，今日有老公嚟就唔使佢嚟。」
GiGi姐表示要休息三個月，一個月後要覆診，再評估右邊膝蓋是否需要做全膝人工關節置換手術，她說：「其實兩隻腳本身都嚴重，但當時醫生話唔可以兩隻腳一齊做。」問到是否需要戒口？她說：「反而要我食多啲肉，因為蛋白質令到肌肉增強，一日做兩次物理治療，係屋企做都可以，下星期三就返嚟拆線。」
提到她與陳倩揚合作主持的香港開電視節目《揚GI甘露》有否受到影響？GiGi姐表示：「明年3月先拍，如果右邊膝蓋要做手術，點都要做埋工作先。」GiGi姐坦言要寄語後生女，不要穿高跟鞋跑，她說：「我以前拍嘢，着住4吋高踭鞋跑，其實好勞損，有一次我拍完嘢，公司車我返屋企，前面條長命斜有交通意外，於是我落車行番屋企，我一路行已經覺得好辛苦，我又冇理由赤腳行，所以死頂，當時兩個膝蓋腫晒，要call醫生嚟幫我抽水，醫生話好彩冇發炎，之後拍《吾淑吾食》，有晚我喺公司停車場攞車，隻腳突然郁唔到，於是公司即刻送我入院，醫生話要我即刻做手術，但我話唔得，因為要開工，又要返加拿大，之後就咁捱咗4年，而家先至做手術。」GiGi姐表示左膝蓋換了金屬全膝，有了醫生證明，就不用擔心返加拿大過關時會響機。
採訪、攝影：黃曉妍