八方早前報道過，喺傳統印刷媒體近年漸漸失去市場優勢之時，網上最熱門嘅討論區「香港高登」卻逆流創辦月刊《巴絲打》（Goodest Magazine）。創刊號封面噚日終於曝光，由高登網站行政總裁、人稱「方丈」嘅林祖舜撐住傘同「膠神」高小登一齊現身，令人拭目以待內容包括「破地獄」挑戰神秘食店喎，創刊價訂喺15蚊，唔知巴絲打會唔會由網上齋噏、跳入現實真金白銀科水幫襯？

設女性專區

高登特別為咗《巴絲打》開設新網站( http://www.goodest.com.hk/ )，網頁透露《巴絲打》邀請到作品曾搬上大銀幕嘅高登小說作家，包括著作《一路向西》嘅「向西村上春樹」、屢發潮文嘅「堂前燕」，以及旅遊專欄作家項明生等擔任專欄作家。「方丈」林祖舜則會邀請商界奇才討論營商心得及創業經驗等。
據知月刊亦有旅遊專欄、並搜羅城市隱世食店，揚言會「破地獄」挑戰神秘食店同分享簡單食譜。當然唔少得為「宅男」設立遊戲欄目，分享動漫遊戲，女性專區亦一樣有，會以「揭示」女人心事為目標，照顧「絲打」需要。
原來《巴絲打》仲會推出首個討論區及雜誌雙連載小說，讀者如果想睇完全篇小說，須分別喺討論區同雜誌追看，網民亦可以喺討論區留言，一齊創作小說情節。
林祖舜喺新聞稿話呀，本港紙媒仍有好大空間，高登討論區係充滿話題嘅寶藏，決定以雜誌形式紀錄屬於香港人嘅集體回憶，希望《巴絲打》有助討論區內容「推上報」。《巴絲打》9月29日喺OK便利店有售。

李八方
mailto:[email protected]