【三不認陸媒】鳳凰衛視省靚港媒招牌 曾志豪勸邱局長看清形勢
蘋果日報 2020/04/09 17:59
蝙蝠鳳凰衛視曾志豪特朗普
曾志豪拍片談：「點解鳳凰衛視要扮NOT from China？」（互聯網圖片）- 邱騰華 （資料圖片）
鳳凰衛視女記者王又又在美國總統特朗普前面，三次否認自己屬中國媒體，令外界關注。《頭條新聞》主持曾志豪昨日在YouTube拍片，分析當中內情，以「蝙蝠」比喻鳳凰衛視，他說：「鳳凰衛視你夠膽講自己同中國冇關係，固然係笑話。做媒體嘅朋友都知道，紅色資本、軍方背景，好多訂戶受眾都係中國內地。我讀書年代已講緊佢哋好似『蝙蝠』，唔係病毒宿主，而係寓言故事。蝙蝠究竟係哺乳類定鳥類動物，去哺乳類會話你有翼，應該係雀鳥，佢行去雀度又會話冇羽毛，你唔係蛋生出嚟，你屬哺乳，身份尷尬。香港人覺得你係國內媒體，返到國內民眾，你又唔係自己人。」
曾志豪直言王又又犯下政治大禁忌，被特朗普「識穿」意圖後，三不認陸媒，他續說：「引伸一種政治嘅尷尬，香港唔係中國一部份，你嚟自香港即嚟自中國，根據我哋一中原則下。佢明明係中國大外孫，點解喺呢啲關頭唔敢認自己係嚟自中國，而不停強調自己嚟自香港，呢樣就係香港優勢，香港獨有嘅一種價值，特別在新聞媒體上。」
曾志豪分析王又又當時的心理狀態，說：「大家明白，佢亦深知肚明，如是來自中國，就係黨媒，嚟自中國，喉舌受到嚴格規管，呢啲唔係造謠，而是光榮同紀律。佢驚畀特朗普知道鳳凰衛視女記者，咪係嚟自中國嗰邊嘅聲音，以中國政府嘅姿態嚟質問我嘅啫。但佢好想講人知佢係獨立自主嘅一個媒體，所以強調佢喺嚟自香港，亦即係話個女記者，佢知道香港，Hong Kong呢個字喺國際社會嘅含金量，意式形態，嗰種價值，嗰種代表嘅人權、自由、監察、批判嘅力度，係同嚟自China係完全唔同。」
香港人多個月來的抗爭，至今仍想堅持，其實是希望中國和香港有一種區隔，他續說：「區隔唔係獨立喎，因為我哋大家都深知肚明，香港係有一種獨特嘅價值，有一種獨特嘅意識形態，以前我哋香港人講呢番說話就會俾人話我哋港獨，現在其實係有一個，接受內地任務嘅人，連佢哋都要強調香港、香港，我哋其實應該好開心，proud of Hong Kong，我哋終於都可以向全世界證明，香港媒體仍有新聞自主呢個招牌！」
曾志豪希望商務及經濟發展局局長邱騰華局長能看清時勢：「如果香港電台或其他媒體，真係受邱騰華同佢哋嘅伙計嗰種約制、管束，將媒體自由收番，去推動一中國家原則，咁以後香港媒體會變成點，咪鳳凰衛視咁囉。以後特朗普問你嚟自邊度，香港咪一樣，以後特朗普都可以咁講，因為我哋惡化咗、劣質化咗，我哋連提問都失去勇氣，我哋連提問都要諗國家完整主權，跟埋佢嗰種思維，香港玩完！香港媒體玩完！.....佢呢個例子，話畀邱騰華聽，你係咪想害死國家呀？係咪想拖國家後腿？大外孫以後仲有咩外衣？！香港電台係堅持自己嘅價值，唔係為自己，而係為國家做貢獻，麻煩邱局長好好認清現時形勢。」