今日，李克強一錘定音，落實開通深港通，正當不少戰友舉杯慶祝之時，我笑而不語。人最大嘅煩惱，就係記性太好。

十一號，2014年4月11號，當日李克強堅定不移，決定滬港互聯互通。回首當日，李克強總理的公佈，字字鏗鏘，「雙向開放」、「健康發展」，北水真正南調，山河壯麗。就喺呢一日之後，我決定跟住買張滬港車票，我仍記我，當時心暗叫一句：「起飛啦！」

結果，恒指喺公佈後，第一日就跌市，如是者，一個月內，跌足1440點。秋刀魚會過期，肉罐頭會過期，連保鮮紙都會過期，但我想唔透，點解消息公佈一日就已經過期？不是說要一起健康發展嗎？李克強發過期罐頭畀我，教我如何健康唔肚痾？於是我睇睇恒指圖，原來罐頭真的過期了，恒指於一個月前，已累積升2000點。

世間最痛苦的事莫過於等待，終於港股一年後終於爆發。寧可一思進，莫在一思停。我當時只顧掃呀掃，甚麼港交所（388）、AH折讓股、券商股、內銀股，連可怕嘅殼股，我都不停的掃，掃得我得意忘形，忘了一年前，我曾提醒自己，呢架叫「滬港通」嘅直通車係無BRAKE，佢只可以一直咁開呀開，但呢種無BRAKE直通車，一世只可以停車一次，就係炒嗰陣。

6月股災，大市炒了，李克強暴力救市，十隻有九隻A股跌停炒埋一碟，結果一開初口口聲聲的「雙向開放」，變成「單向獨沽」，港股慘成提款機。

今日，十六號，2016年8月16號，兩年後的今日，李克強再一次堅定不移「深化內地與香港金融合作」，要貫徹落實「發揮深港區位優勢」，特別強調「改革開放是當代中國最鮮明的特色」，我聽到就覺得恐怖，是合作有事就沽爆港股？發揮港提款機優勢？改你、革你然後開佢嘅放嗎？

有燈就有人，我再睇恒指圖，恒指今日已突破九個月高位，過去一個月，恒指累積升超過2410點。李克強公佈「深港通」這天是鬼節，所以我會當他是鬼。至於「深港通」，我再也不會懷疑，這是不是過期罐頭，因為，答案是肯定的。

一個人的記性不好，就不要去太多是非之地，因為你可能忘記你的仇人。現在李克強再多一張深港車票，你說，我還願不願意跟你一起走？

by千頌C@堆填區
http://fb.com/winbigwok