超級英雄漫畫Marvel原創人、有Marvel之父之稱嘅Stan Lee創作過唔少英雄人物，如美國隊長、鐵甲奇俠等等，全部都發行過漫畫書。據內地報道Stan Lee會同中國基美影業電影公司合作，全新創作喺以往漫畫未出現過嘅英雄人物「虎影俠」，女主角就係李冰冰。冰冰之前已演過《生化危機5》做Ada Wong，今次仲擔正做女主角，睇嚟佢同死敵范冰冰嘅惡鬥仍未完。

兼任製片

據內地報道李冰冰除咗做女一亦會做埋創意製片人，故事由Stan Lee創作，呢部片會着重打造首位中國超級女英雄。《虎影俠》製片人高敬東話，今次同Stan Lee合作係要同世界接軌：「我們要把中國人對英雄的理解，融入到西方人的超級英雄工業化概念裏去。我們邀請李冰冰主演是因為她各方面的條件都具備東方女俠的文化特徵，她之前出演的《變形金剛4》、《生化危機5》都得到了西方觀眾的認同。」Stan Lee亦話：「打造一位國際化的女性角色，特別是有幸能創造首位中國超級女英雄，這真的很酷！」 一向鍾意客串嘅Stan Lee今次唔知會用乜嘢身份喺呢部戲度出現。
撰文：馮仁昭