王君馨(Grace)早前透露跟老公Daniel返美國慶祝感恩節，被嫲嫲暗示要為夫家開枝散葉，佢話︰「嫲嫲話老公係七代單傳，要靠我傳宗接代。但我對生BB好矛盾，想享受多一陣二人世界同發展事業。」佢話生仔順其自然，但就會做足安全措施......咁即刻短期內都唔會生住啦。

君馨依家好努力工作，上周三(13號)喺中環大會堂對開一片空地為新劇《是咁的法官閣下》拍攝煞科戲，現場有一個架吊臂車架，君馨就即場跟排舞師學跳舞。

君馨話晒喺08年《舞動奇跡II》嘅冠軍級人馬，即場學都跳得有板有眼，見佢舞姿都好誘人，又要自摸、彎腰趴低兼轉圈，但唔知係咪受「限奶令」影響，見君馨衣著都比平時收歛，只係着住一件白色鴛鴦袖恤衫襯黑色長裙，雖然跳到披頭散髮兼周身汗，但舞姿依然好有美感，白恤衫下更透現玲瓏浮凸身材。

君馨全程冇乜休息，基本上係唔使NG，只係某啲近鏡頭要拍多一、兩個take，有時動作太大，疑黑絲襪滑咗落嚟，佢就即場抽起條裙拉番高對絲襪，約半小時就完成拍攝收工。

更多娛聞，喺晒《娛果》
http://fb.com/appledailyent