要走入官場做高官，要做嘅第一件事就係令建制派唔討厭你，否則官運難以亨通。早前盛傳港台《城市論壇》主持蘇敬恆因為俾建制派「打毒針」，搞到冇得做食物及衞生局政治助理，最新一輪嘅副局長、政助名單上，蘇敬恆仍然榜上無名。佢噚日主持完《城市論壇》後，唔正面回應建制派令佢做唔成政助嘅傳聞，只係話如果一切冇變，佢將會繼續主持《城壇》，而至今佢未有向港台遞信話唔撈。

「希望林鄭畀年輕人參政」

蘇敬恆噚日一聽到記者行家問佢係咪俾建制派搞到冇得升官，佢只係話希望政府搵到合適人選，出任問責班子餘下兩個空缺。但特首林鄭月娥當選後講明要用人唯才喎，𠵱家俾人篤一篤背脊，政府就唔敢委任佢，係咪冇落實承諾先？蘇敬恆話，總之希望林鄭能落實其政綱，畀年輕人機會議政、參政。
當佢被問到有冇向港台請辭呢？佢就話自己一直係港台員工，未來會繼續擔任《城壇》主持，嚟緊《城壇》會討論月中公佈嘅施政報告、中共十九大人事變動等，「如果一切冇變，（《城壇》）會繼續由我主持」。咁講，冇得做政助嘅可能似乎真係好大。
《城市論壇》噚日討論港澳辦、中聯辦近日換人，點樣影響香港社會，有觀眾就真係心水清，喺台下發言時話蘇敬恆係因為中聯辦而未能出任政助，點可能話中聯辦冇干預香港事務呢？蘇敬恆事後笑笑口話，「可能有啲朋友睇咗一啲報道」。

李八方