兩人越講越起勁,連家輝「我四渣渣輝」普通話水皮事件都拿來傾,林雪笑家輝普通話比自己好:「起碼咁多人討論,我嗰啲冇人討論。」阿聰更自爆瘀事:「我都有份,我『渣繼聰』,佢可以話推動咗我哋學普通話決心。」
此時家輝就忽然出現踩場,問:「喂,你哋又講緊我啲乜嘢呀?」阿聰反應好快:「冇呀,講緊茶道之嘛。」家輝坐下後用手玩林雪面上條毛,林雪醒目說:「呢條毛好奇怪,佢見到導演就蹺起,導演千祈唔好摸佢,你一摸佢就鬆毛鬆翼。」記者問家輝再開戲會否找兩人演出?家輝說:「唔使講啦,佢哋唔嫌棄我嘅話。」林雪聞言大叫:「嘩,導演,好愛你呀!」全場大笑。
採訪:余燕儀
攝影:陳俊強