懷孕五個月嘅陳茵媺,終於動身返香港喇。之前陳豪已放風話老婆仔會於月底前返港,仲話到時一定通知大家,果然,有傳媒拍得陳茵媺喺多倫多時間27號、半夜12點半,由家人陪同下現身多倫多機場,準備返港喇。抵埗時間,預算係香港時間凌晨4點半左右。
久未露面嘅陳茵媺,穿上大褸,黑色及膝裙,戴上黑超,笑容滿面。即使見有記者在場,依然未有影響其心情,繼續笑晒揮手。陳爸爸就負責推行李,又陪女兒辦登機手續。今日麥長青受訪時透露茵媺嘔得好辛苦:「大肚婆再遲搭飛機唔好,我知Aimee好想喺Mo(陳豪)身邊,聽講佢嘔得好犀利。」但睇片就見佢精神煥發,仲陀得幾靚添。
仲有大約八個鐘左右,茵媺就返到香港喇,到時陳豪一定乖乖接機,再拖實老婆仔返屋企啦。好期待見到準靚媽返嚟呀!