ViuTV劇集《VR驅魔人》噚晚首播，呢套劇係王貽興同劉翁（Sunny）自編自導自演嘅作品，雖然只係播咗第一集，不過網民嘅反應都覺得成套劇幾特別，節奏好快，對白亦都好貼地，仲有人覺得ViuTV應該搞多啲自家劇，總好過成日買外購劇！王貽興嗰陣喺大台做主持《謎》同《最緊要正字》嘅時候，佢嘅主持風格俾網民彈到飛起，不過今次嘅感覺亦同以前好唔同，佢喺劇對白裡面都有自抽，好似劉翁同飾演婆婆嘅余慕蓮亦都有重提呢件事，王貽興就話：「嗰陣我啱啱入電視台，啲人叫我做乜咪做乜，邊有得揀，你估我想嘅咩。」

跟住佢同劉翁為咗轉台問題，王貽興話有電視台啲劇好爛，但係仲有得播，反而佢哋啲劇好咁多，就係冇人俾機會，劉翁即刻話你係咪第一日出嚟撈？飾演舅父嘅葛民輝，每晚8點03分都會由廚房同客廳撲嚟撲去，重演翻當日老婆跳樓嘅情景，阿葛拎住把菜刀劈嚟劈去，佢哋兩個又好合拍咁避到喎！

今日王貽興接受《蘋果》嘅訪問，佢話：「其實呢個可以話係半自傳嘅drama，香港好少人玩呢類題材，我哋好鍾意啲懷舊嘢，再加上呢幾年遇到啲好光怪陸離嘅現象，但係好似冇人敢講喎，於是同Sunny提心一橫，反正我哋都人到中年，拍一套自編自導自演嘅電視劇，唔使俾人扭曲同強姦，所以咪去到盡，就算衰都係衰喺自己手上！」

講到當年做主持俾網民批評嘅事，王貽興話：「大家喺嗰個地方逗留過，當佢有一個節目俾你嘅時候，就算你覺得唔適合，但係當你推咗嘅話，睇怕未必會有下一次機會，咪唯有盡力做好佢，當你俾人笑足10年嘅時候，呢啲咪當人生經歷，適當嘅時候咪拎出嚟笑番自己，捱過咗就冇嘢！」佢仲話：「除咗有我自己嘅黑歷史之外，仲會有好多香港人嘅集體回憶！」

制肘方面，王貽興話：「公司話最好唔好真係有鬼嘅事，我哋話全部都係人扮，只係有一場講係性商店嘅戲，要打晒薄格，我哋又唔想cut晒成場戲，唯有打格，呢啲係小瑕刺，公司話如果收視好，會將所有刪咗嘅戲份整個特輯！」至於阿葛撞邪嗰場戲，佢話：「有朋友打嚟讚呢場戲好好睇，呢啲係以前電影常見嘅嘢，我哋事前度咗好耐，雖然係一take過，但係拍完大家都發覺啲手撞到瘀晒，不過出嚟嘅效果好，就覺得好值得！」

精選娛聞，喺晒《娛果》
http://fb.com/appledailyent